Te pātai rangahau
He aha ngā mea e hiahia ana a Leeana kia mōhio ia? He aha tana pātai rangahau?
“Ko te mea i hiahia ai au kia mōhio au, me pēhea taku whakatakoto i aku āwangawanga ki tētahi hoamahi tautōhito ake, pakeke ake i a au, e pā ana ki ētahi āhuatanga o tana mahi, me te hāpai anō i ngā kaupapa Māori.
“I te hui whakangungu a Wini, ka kōrero tētahi pouako mō tētahi ariā pāngarau e hāngai ana ki tētahi ngohe mātauranga. Ka mea ake te pouako, ko ngā ākonga o te tau 8 e whāwhā ana i taua ariā, e mahi ana i te taumata tika. Kāore i puta i a Wini he whakautu.
”E āwangawanga ana au i te mea he ariā tērā nō tētahi taumata o raro noa ake, engari kāore a Wini i kōrero mō te tika o te taumata. Ka roa tonu au e whakaaro ana ka pēhea mēnā ko au e whakahaere ana i te hui, mēnā ko au e whakautu ana i te kōrero a taua pouako.
“Heoi anō, he tamariki noa ake au i a Wini, nō reira i a au e mea ana ki te whakatakoto i aku whakaaro ki a ia, ka āhua tawhitawhi au ki te whakatakoto i aku māharahara, ki tēnei wahine pakeke ake i a au. I te hiahia au kia ārahina au ki tēnei tūāhua, i taupatupatu ai te kaupapa Māori me ngā kawenga kei runga i a au hei kaiwhakangungu ngaio. Me taku mōhio anō, i roto i ngā tau, tērā tonu kua pā tēnei raru ki te tokomaha tonu o ngā kaiwhakangungu āhua tamariki tonu e whakangungu ana i ngā pouako.
“Nō reira, ko taku pātai rangahau, ‘Me pēhea taku whai kia ngaio aku mahi tahi ki ngā pouako, ki ngā hoamahi, e noho ai ko ngā hiahia o ngā ākonga ki mua, engari me te ū anō ki ngā kaupapa Māori?’”
Pēhea nei te hāngai o te pātai rangahau ki āu ake mahi?
Kōrerotia mai tētahi āhuatanga i pā i nā tata nei, i taupatupatu ai ngā kaupapa Māori me ō kawenga ngaio, ki tāu titiro.
He aha ngā āhuatanga i pā?
I pēhea tō aro atu ki taua āhuatanga?
He aha i pērā ai te āhua o tō aro atu?
I pēhea te āwhina, te whakararu rānei o āu mahi i ngā kawenga ngaio a ērā i whai wāhi mai?
He aha koe i mōhio ai? He aha ngā taunakitanga e tautoko ana i ō whakapae?
- Next item
Ngā whakapono >
