Ngā whakapono – nā Kaa Williams
Me pēhea taku whai kia ngaio aku mahi tahi ki ngā pouako, ki ngā hoamahi, e noho ai ko ngā hiahia o ngā ākonga ki mua, engari me te ū anō ki ngā kaupapa Māori?
E toru ngā take kei roto i tēnei pātai. Ko tērā e pā ana ki ngā pāhekoheko ngaiotanga i waenga i ngā hoa mahi, i ngā kaiwhakaako, ko tērā e pā ana ki ngā kōingo o ngā ākonga, me te noho pono ki te kaupapa Māori.
Ki taku titiro, karekau he whakapātaritari, he whakatumatuma i waenganui i ēnei kaupapa. Kāore hoki he wehewehenga. He kaupapa kotahi, e mahi tahi ai ki te tuitui i ngā mātauranga ahakoa Pākeha, ahakoa Māori, hei painga mo te ākonga.
Ka kapo ake i te pohewa ataahua o te ‘whakakanikani i te whakaaro’. Tukuna kia rere ngā kare-ā-roto, te kōhara, te nekehanga, te rongo i te kotahi o ngā whakaaro, i runga i te mahi ngātahi.
Manaakihia ngā mātauranga Māori, ngā tikanga Māori, me te wairua Māori o ngā mahinga. Aro tonu ki te ngaiōtanga o te mahinga kaiwhakaako ā kia mau tonu hoki ki ōu ake whakaaro.
